इस्लामपूर (सांगली) : शाळेचा पहिला दिवस म्हटले, की शाळांमध्ये लहान मुलांचा रडण्याचा आवाज येतो. पण इस्लामपूरमधील मुक्तांगण प्ले स्कूलच्या आवारातील चित्र काहीसे वेगळेच होते. या शाळेत पहिल्या दिवशी केक कापून आनंद साजरा करण्यात आला.
शाळेच्या आवारात वृक्षारोपण करण्यात आले. शिक्षणातील आपले पहिले पाऊल टाकताना या चिमुकल्यांमध्ये प्रचंड उत्सुकता होती. येथील प्रशासकीय इमारतीच्या परिसरात चार वर्षांच्या आतील मुलांसाठी खेळातून शिक्षण देण्यात येते. शाळेच्या पहिल्या दिवशी सकाळी मुले आपापल्या पालकांसोबत शाळेत आली. शाळेतील खेळणी, गाड्या, झोपाळे, घसरगुंडी पाहून मुले हरखून गेली. शाळेच्या आवारात रडणारी मुले हे चित्र नव्हतेच मुळी.
नवीन खेळणी पाहून मुले पहिल्या दिवशी छान रमली. मुक्तांगणच्या आवारात असलेल्या आकर्षक बाग, रंगीबेरंगी फुलझाडे यांच्यामुळे वातावरण अधिकच प्रसन्न वाटत होते. शाळेच्या आवारात आकर्षक सजावट करण्यात आली होती. शाळेच्या संचालिका वर्षाराणी मोहिते म्हणाल्या, ‘गेली सहा वर्षे आम्ही मुलांचे व्यक्तिमत्व घडवत आहोत. यासाठी पालक आणि शिक्षकांचा समन्वय साधून आम्ही विविध उपक्रम राबवतो. मुलांना शिक्षणातील वेगवेगळे अनुभव देतो. यातून आदर्श नागरिक घडवण्यासाठी प्रयत्न केले जातात’. पालक प्रदीप व जानव्ही बावचकर यांनी वृक्षारोपण केले. प्रशालेच्या अध्यक्षा सरोजनी मोहिते यांनी महात्मा फुले व सावित्रीबाई फुले यांच्या प्रतिमेचे पूजन केले. विनोद मोहिते यांनी स्वागत केले.
